مراجعه ماما ياسمين عبيد لقصة أنا وأفكاري

كتير مننا بيعاني من مشاكل التفكير المفرط أو الـover thinking ودا بيتم وصفه بمشكلة العصر لإنه لو لم يتم التعامل معاه بطريقة مناسبة بيؤدي إلى أمراض تانية زي القلق والاكتئاب واضطرابات الصحة النفسية والعقلية -عافانا الله وإياكم-

طيب دا إيه علاقته بالقصة؟

القصة جمالها في تبسيط مشكلتنا دي بشكل يحميكي ويحمي طفلك من السيناريو اللي بنتعرض ليه كلنا وهو صراع وغزو الأفكار وتشتيتها لينا عن القيام بالمهام اليومية أو اتخاذ القرارات المناسبة

دا غير انها بتقدم حلول بسيطة وسهلة ومناسبة للطفل يقدر يعملها عشان يدرب نفسه من وهو صغير على كيفية التعامل مع أفكاره

عجبني إن مفيش اسم لبطلة القصة عشان كل طفل يقرأها يحس إن هو البطل ودي قصته ودي أحداثه ويمر بكل المراحل فيها لحد ما يوصل للهدف اللي هتحققه بطلة القصة في النهاية وهنحتفل بيه معاها

والرسومات جميلة وشجعتني اصور القصة في الطبيعة وخاصة صفحة لوحة ليلة النجوم لڤان جوخ اللي لازم تنتهزي فرصتها وتعرفيه عليها

بعد ما تقرأي القصة لطفلك افتحي معاه نقاش مسلي عن أفكاره خلال يومه، ايه هي؟ وازاي اتعامل معاها؟ وازاي يقدر يصنفها إيجابية، سلبية، مفيدة، يمكن تحويلها إلى شيء ننفذه وهكذا

الصفحة الأخيرة من القصة هتساعدك على النقاش دا دا غير ان فيها رسايل لطيفة ليكي ولطفلك كعبرة وتوجيهات ونصائح

وفي النهاية، تمنياتي ليكم بقراءة ممتعة وصداقة جميلة ما بينكم وما بين أفكاركم